Låg risiko for kontaminert morsmjølkerstatning

EFSA og ECDC er EUs myndigheter for næringsmiddeltryggleik og smittevern.

Morsmjølkerstatningsprodukta ble kalla tilbake etter påvising av cereulid, eit toksin produsert av enkelte stammar av Bacillus cereus. Ei ny vurdering konkluderer med at sannsynet for eksponering for kontaminert morsmjølkerstatning no er lågt, som følgje av omfattande tilbakekallingar i fleire land.

Rapporterte tilfelle av sjukdom

Per 13. februar 2026 hadde sju land – Austerrike, Belgia, Danmark, Frankrike, Luxembourg, Spania og Storbritannia – rapportert om spedbarn med magetarmsymptom etter å ha fått i seg morsmjølkerstatning. Det pågår framleis undersøkingar for å identifisera eventuelle fleire tilfelle i EU, og for å vurdera om tilbakekalla parti eller andre parti kan ha vore årsaka til sjukdom.

Klinisk tilstand hos ramma barn

Den samla vurderinga viser at dei fleste rapporterte tilfella hadde milde symptom, men det er òg registrert sjukehusinnleggingar på grunn av dehydrering. Ekspertar peikar på at symptoma kan likna vanlege virale magetarminfeksjonar, og at laboratorietesting for cereulid i kliniske prøver ikkje er rutinemessig tilgjengeleg. Dette gjer både identifisering og stadfesting av tilfelle utfordrande.

Bakgrunn for tilbakekallinga

I desember 2025 starta tilbakekallingane etter funn av cereulid i parti av morsmjølkerstatning som inneheldt ARAolje (arakidonsyre) frå ein produsent i Kina. I februar 2026 vart tiltaka utvida etter publiseringa av EFSAs risikovurdering av cereulidnivå i morsmjølkerstatning. Vurderinga inkluderte også fastsetjing av ein akutt referansedose (ARfD) for spedbarn, og grenseverdiar for når konsentrasjonar i ferdig utblanda produkt kan gi grunn til bekymring.

På bakgrunn av tiltaka som er sette i verk, vurderer EFSA at sannsynet for eksponering for kontaminerte produkt no er lågt i EU. Det kan likevel oppstå nye tilfelle dersom tilbakekalte produkt framleis finst i hushald og blir brukte.

Helseeffektar av cereulid

Cereulidforgiftning gir vanlegvis kvalme og oppkast, og er ofte mild. Spedbarn under seks månader kan likevel vera meir sårbare for dehydrering og elektrolyttforstyrringar. Den felles hurtigvurderinga vurderer helsepåverknaden som låg til moderat, avhengig av alder og inntak.

EFSAs vitskapskomité fastsette ein ARfD for cereulid hos spedbarn på 0,014 μg/kg kroppsvekt. Konsentrasjonar i ferdig utblanda morsmjølkerstatning over 0,054 μg/L – og over 0,1 μg/L for tilleggsnæring – kan overskrida desse trygge nivåa. Vurderinga nytta ein førevartilnærming, særleg fordi svært unge spedbarn (under 16 veker) metaboliserer stoff annleis enn eldre barn og vaksne.

Råd til forbrukarar

EFSA understrekar at produkt som er kalla tilbake ikkje skal givast til spedbarn eller små barn. Forbrukarar bør følgja instruksjonar og råd frå nasjonale mattryggleiksstyresmakter, som i Noreg er Mattilsynet.

Foreldre og omsorgspersonar bør vera merksame på symptom som oppkast og diaré hos spedbarn og små barn. Ved vedvarande eller alvorlege symptom, eller mistanke om dehydrering, bør ein kontakta helsepersonell.

Les meir hos Mattilsynet:

Morsmelkerstatning og produkter for spesielle medisinske formål fra Nestlé trekkes fra markedet etter funn av toksin i en oljeråvare | Mattilsynet

Les meir hos EFSA:

EFSA and ECDC rapid outbreak assessment on cereulide incident: likelihood of exposure low | EFSA Lenke til et annet nettsted, åpnes i nytt vindu.

Denne saka vart oppdatert 20. februar 2026.